Собор Дивеевских святых 14/27 июня
Источник: сайт http://v-diveevo.ru/ikona-sobor-diveevskikh-svyatykh.html
Тропарь общий, глас 5
Днесь церковная расширяются недра,/ приёмлющи богатство Божия благодати/ и радуется Пресвятыя Богородицы избранная обитель,/ память совершающе многоименитаго лика святых,/ в Небеснем Дивееве торжествующих/ и молящихся о душах наших.
Кондак общий, глас 8
Троицы сосуди явистеся честным вашим житием/ и Пресвятыя Богородицы послушницы,/ вси святии в земли Дивеевстей просиявшии,/ помянйте нас у Престола Божия во Царствии Небеснем.
МОЛИТВА
О всечестный соборе святых, в земли Дивеевстей просиявших, полче Божественный, подвиги своими в Царское победоносное ополчение возшедый! О святии, любовию ко Пречистей Деве Марии и Уделу Ея Четвертому совокуплении, избранницы Царицы Небесныя и приснии Ея послушницы! Се ныне в день общаго вашего торжества приносим вам сие хвалебное пение.
Прославляем твоя великия чудеса, преподобне отче наш Серафиме, любимиче и собеседниче Владычицы нашея Пресвятыя Богородицы и всем прибегающим к тебе скоропослушный помшниче! Сохрани нас от прелестей мира сего лукаваго, да отвергшеся себе и вземше крест свой, последуем Христу, распинающе плоть свою со страстьми и похотьми, носящи тяготы друг друга.
Ублажаем ваше святое житие, преподобныя Александро, Марфо и Елено, начальницы обители Дивеевския, камень веры во основание ея положившия, терпением и мужеством до конца врага низложившия и нас от козней его избавляющия. Молитеся да дух вашея любве ко Господу и ревность о угождении Ему не оскудевает в нас.
Восхваляем вашу богоподражательную любовь, блаженныя Христа ради юродивыя матери наша Пелагие, Параскево и Марие, ибо посрамили есте премудрость века сего, возносящуюся на разум Божий. Помозите нам спасительным буйством Креста Христова утвердившеся, горняя присно, а не земная помышляти.
Величаем ваши великии подвиги, новомученицы и исповедницы преславнии Серафиме, Михаиле, Иакове, Пелагие, Марфо и Матроно, Евдокие, Дарие, Дарие и Марие. Споспешествуйте нам веру православную твердо содержати, да спасительное семя, вами всеянное, не изсушено будет зноем неверия, но плод изобильный да принесет.
О святии сродницы наши! Не оставите чада ваша духовная, да в будущем веце услышим от вас блаженный глас ко Господу: се мы, и дети, яже дал еси нам, Господи! И, радующеся, купно с вами прославим Бога, в Троице покланяемаго, Отца, и Сына, и Святаго Духа, ныне и присно, и во веки веков. Аминь.
Величание
Величаем вас,/ вси святйи землй Дивеевския,/ и чтим святую память вашу,/ вы бо молите за нас/ Христа Бога нашего.
